ខេត្តកំពង់ឆ្នាំង ៖ នៅថ្ងៃទី២០ ខែវិច្ឆិកា ឆ្នាំ២០២៥ នេះក្នុងខេត្តកំពង់ឆ្នាំង នៅតាមបណ្តាក្រុង/ស្រុកទាំង៨ បានចេញយុទ្ធនាការ សម្អាតអនាម័យ បរិស្ថាន សណ្តាប់ធ្នាប់តាមដងផ្លូវ នៅក្នុងមូលដ្ឋានរបស់ខ្លួន តាមដងផ្លូវជាតិលេខ៥ ចាប់ពីចំណុចព្រំប្រទល់ខេត្តកំពង់ស្ពឺ រហូតដល់ព្រំប្រទល់ខេត្តពោធិសាត់ គឺអនុវត្តរួមគ្នាជាមួយប្រជាពលរដ្ឋ សិស្សសាលា អាជ្ញាធរមូលដ្ឋានយកម៉ាស៊ីនកាត់ស្មៅ សម្អាតតាមដងផ្លូវទាំងអស់គ្នា និងធ្វើការផ្សព្វផ្សាយជារួម។
លោក សេង វិចិត្រ អភិបាលស្រុករលាប្អៀរ អោយដឹងថា ការណែនាំរបស់ឯកឩត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង បានរៀបចំឲ្យធ្វើអនាម័យបរិស្ថាន សំអាត គ្រប់ទិសទីទាំងអស់ ដោយឡែកស្រុករលាប្អៀរ អនុវត្តសម្អាតចាប់ពីព្រំប្រទល់ស្រុកបរិបូរណ៍ រហូតដល់ព្រំប្រទល់ស្រុកកំពង់ត្រឡាច មានការប្រើប្រាស់កម្លាំងឃុំទាំង១៤ ដែលមានម៉ាស៊ីនកាត់ស្មៅជាង ១៣០ គ្រឿង ។
កិច្ចការងារខាងលើ ជាការចាត់តាំងអនុវត្តទិវាអនាម័យបរិស្ថានជាតិ ២៣វិច្ឆិកា ឆ្នាំ២០២៥ នៅខេត្តកំពង់ឆ្នាំង ក្រោមប្រធានបទ “ទម្លាប់ស្អាត គ្រួសារស្អាត បរិស្ថានល្អ” ។ ទិវាអនាម័យបរិស្ថានជាតិ និងក្នុងគោលបំណងលើកកម្ពស់ការអប់រំ ផ្សព្វផ្សាយ និងជំរុញចលនា ពី ប្រជាពលរដ្ឋ ព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្ស និស្សិត ឱ្យចូលរួម ធ្វើអនាម័យកែលម្អ សោភណភាពទីក្រុង ទីប្រជុំជន ជនបទ ភូមិឋាន វត្តអារាម សាលារៀន មន្ទីរពេទ្យ រោងចក្រ សហគ្រាស ទីផ្សារ និងមជ្ឈមណ្ឌលសេដ្ឋកិច្ច សំដៅរួមចំណែកកសាងសង្គមកម្ពុជាឱ្យមាន បរិស្ថានល្អស្អាត និងភាពស្រស់បំព្រង។ ដើម្បីធានានូវសោភណភាព កិច្ចគាំពារសុខភាពសាធារណៈ និងបរិស្ថាន ចាំបាច់ត្រូវយកចិត្ត ទុកដាក់លើកកម្ពស់ ការគ្រប់គ្រងសំរាមសំណល់រឹងទីប្រជុំជនឱ្យបានត្រឹមត្រូវ ដោយត្រូវវេចខ្ចប់ និងញែក សំរាម សំណល់រឹង ទីប្រជុំជនដែលអាចប្រើប្រាសឡើងវិញ ឬកែច្នៃបាន ដោយឡែកពីសំណល់រឹងដែលត្រូវ បោះចោល ៕
